بلوچستان ضلع کیچ اور دکی میں مسلح افراد نے فورسز کیمپ اور ٹاور پر حملہ کردیا ۔
ضلع کیچ کے علاقے تجابان میں تین اور چار اکتوبر کی درمیانی شب مسلح افراد نے پاکستانی فورسز کے کیمپ کو راکٹوں اور بھاری ہتھیاروں سے حملے میں نشانہ بنایا ۔
علاقائی ذرائع کے مطابق علاقے میں شدید فائرنگ اور دھماکوں کی آوازیں سنی گئیں، حملہ کافی دیر سے جاری ہے ، جس کی وجہ سے فورسز کو بھاری نقصان اٹھانا پڑا ہے۔
حملے کے بعد فورسز نے علاقے میں مارٹر گولے فائر کیے تاہم کوئی جانی نقصان کی اطلاع نہیں۔
ابھی تک کسی تنظیم نے اس حملے کی ذمہ داری قبول نہیں کی ہے۔
دوسری جانب دکی تحصیل لونی کے علاقے کلی ولیانی میں نامعلوم مسلح افراد نے یوفون ٹاور پر فائرنگ کرکے بعد ازاں ٹاور کی مشینری کو آگ لگا کر نذر آتش کردیا ۔
لیویز کا کہنا ہے کہ حملے کے بعد ٹاور سے آگ کے شعلے بلند ہورہے تھے جبکہ فائرنگ کی آوازیں دور دور تک سنی گئیں ۔
