زیارت: بلوچستان کے سیاحتی ضلع زیارت کے علاقے کچھ مانگی میں پیر اور منگل کی درمیانی شب مسلح افراد نے پولیس چوکی پر حملہ کر دیا، جس کے نتیجے میں 9 پولیس اہلکار ہلاک ہو گئے، جبکہ متعدد اہلکار زخمی اور بعض کے اغوا ہونے کی اطلاعات بھی موصول ہوئی ہیں۔
پولیس حکام کے مطابق حملے کے بعد مسلح افراد اور پولیس کے درمیان رات بھر شدید فائرنگ کا تبادلہ جاری رہا۔ فائرنگ کے نتیجے میں 9 اہلکار ہلاک ہوئے، جن کی لاشیں ضابطے کی کارروائی کے لیے قریبی ہسپتال منتقل کر دی گئی ہیں۔
حکام کا کہنا ہے کہ زخمی اہلکاروں کو طبی امداد فراہم کی جا رہی ہے، جبکہ لاپتا اور مبینہ طور پر اغوا ہونے والے اہلکاروں کی تلاش کے لیے سرچ آپریشن جاری ہے۔ واقعے کے بعد علاقے میں سیکیورٹی مزید سخت کر دی گئی ہے۔
حملے کی ذمہ داری تاحال کسی تنظیم نے قبول نہیں کی ہے۔
