بلوچستان کے ضلع گوادر میں مکران کوسٹل ہائی وے پر مسلح افراد کی جانب سے پاکستانی فوج اور پولیس پر حملوں کی اطلاعات موصول ہوئی ہیں۔ علاقائی ذرائع کے مطابق یہ واقعات مکران کوسٹل ہائی وے پر کواری کے مقام کے قریب پیش آئے۔
ذرائع کا کہنا ہے کہ مسلح افراد نے کارروائی کرتے ہوئے پولیس کی ایک چوکی پر حملہ کیا، جہاں موجود اہلکاروں کو یرغمال بنانے کے بعد اسلحہ اور دیگر سازوسامان قبضے میں لے لیا گیا۔ حملے کے بعد مسلح افراد نے چوکی پر عارضی طور پر کنٹرول سنبھالے رکھا۔
اسی دوران مکران کوسٹل ہائی وے سے گزرنے والے پاکستانی فوج کے دو مختلف قافلوں کو گھات لگا کر نشانہ بنایا گیا۔ ابتدائی اطلاعات کے مطابق اس حملے میں متعدد فوجی اہلکار ہلاک ہوئے ہیں، تاہم سرکاری سطح پر ہلاکتوں کی تعداد کی تصدیق تاحال نہیں کی گئی۔
تاحال کسی تنظیم نے حملے کی ذمہ داری قبول نہیں کی۔
