بلوچ یکجہتی کمیٹی کے مرکزی رہنما سمی دین بلوچ نے اپنے ایک ویڈیو بیان میں کہا ہے کہ بلوچستان میں ایک گہرا پریشان کن نمونہ سامنے آرہا ہے، بلوچ خواتین کی جبری گمشدگی کو اب کوئی غیر معمولی جرم نہیں سمجھا جاتا، یہ ایک روزمرہ کا واقعہ بن گیا ہے، تقریباً روزانہ ہی نئے کیسز رپورٹ ہوتے ہیں جن میں خواتین کو ان کے گھر سے ان کے گھر والوں کے سامنے بغیر وارنٹ کے، بغیر کسی الزام کے، اور بغیر کسی معلومات کے حراست میں لیکرجبری گمشدگی کا نشانہ بنایا جاتا ہے۔
سمی دین کا کہنا تھا کہ جو کبھی سوچا بھی نہیں جا سکتا تھا اب اسے معمول بنا لیا گیا ہے۔ جب کہ بلوچستان طویل عرصے سے جبری گمشدگیوں کا شکار رہا ہے، خواتین کو مخصوص نشانہ بنانا- جن میں کم عمر لڑکیاں، شیرخوار بچوں والی مائیں، اور حاملہ خواتین شامل ہیں، ریاستی تشدد میں خطرناک اور ظالمانہ اضافے کی نشاندہی کرتی ہے۔
انہوں نے کہا کہ تاریخی طور پر بلوچ خواتین مزاحمت کی صفِ اوّل میں رہی ہیں—بطور مائیں، بیٹیاں، بہنیں اور کارکنان۔ انہیں نشانہ بنانا کوئی اتفاق نہیں؛ یہ پوری برادری کو خوفزدہ کرنے، عوامی حوصلہ توڑنے اور اُن خاندانوں کو سزا دینے کی سوچی سمجھی کوشش ہے جو انصاف کا مطالبہ کرنے کی جرأت رکھتے ہیں۔
بی وائی سی رہنما نے مزید کہا کہ اس تناظر میں، خاموشی شراکت داری ہے۔ ہم زندگی کے تمام شعبوں سے تعلق رکھنے والے لوگوں سے اپیل کرتے ہیں کہ وہ اس ظلم کے خلاف آواز بلند کریں۔ BYC مہم کے ساتھ یکجہتی کے ساتھ کھڑے ہوں اور تمام اغوا شدہ بلوچ خواتین کی فوری اور محفوظ رہائی کا مطالبہ کریں۔
