افغانستان میں قائم طالبان حکومت نے دعویٰ کیا ہے کہ ایران میں مبینہ طور پر تشدد کے بعد ہلاک کیے گئے دس افغان باشندوں کی لاشیں وطن واپس پہنچا دی گئی ہیں۔
صوبہ فراہ کی طالبان انتظامیہ نے تصدیق کی ہے کہ انھوں نے 11 میں سے 10 افغان شہریوں کی لاشیں وصول کی ہیں۔ سرحدی کمانڈر خطیب فراہی کے مطابق، یہ 12 افراد (فراہ اور ہرات کے رہائشی) غیر قانونی طور پر ایران میں داخل ہوئے تھے، جہاں انہیں گرفتار کیا گیا اور "بے رحمی اور ظالمانہ طریقے سے” مار دیا گیا۔
ان میں سے 11 افراد ہلاک ہوئے جبکہ ایک زخمی حالت میں بچ گیا۔ طالبان وزارتِ داخلہ کے ترجمان عبدالمتین قانع نے بتایا کہ یہ واقعہ تقریباً 20 دن پہلے پیش آیا تھا اور لاشیں ایران کی سڑکوں پر پڑی ہوئی تھیں۔
طالبان حکام کی کوششوں سے لاشیں واپس لائی گئیں اور خاندانوں کے حوالے کی گئیں۔ ایرانی حکام نے تاحال اس واقعے پر کوئی تبصرہ نہیں کیا ہے۔
