ہانگ کانگ کے متعدد رہائشی اپارٹمنٹس میں لگنے والی شدید آتشزدگی میں اب تک 44 افراد ہلاک ہو چکے ہیں جبکہ 279 افراد اب بھی لاپتہ ہیں۔ مزید 45 افراد کی حالت تشویشناک ہے۔
حکام کے مطابق 40 افراد جائے وقوعہ پر ہلاک ہوئے جبکہ چار افراد ہسپتال پہنچنے کے بعد جان کی بازی ہار گئے۔ رہائشی عمارتوں میں آگ پر قابو پانے کے لیے 800 سے زائد فائر فائٹرز 18 گھنٹوں سے مصروف عمل ہیں۔
اس واقعے کو ہانگ کانگ میں آتشزدگی کا سب سے بلند درجے، پانچویں درجے کی آگ، قرار دیا گیا ہے۔
حکام نے تین تعمیراتی کمپنی کے افسران کو غفلت برتنے کے الزام میں گرفتار کر لیا ہے۔ ابتدائی تحقیقات سے معلوم ہوا ہے کہ آگ کی تیز رفتاری میں پولی سٹیرین بورڈز کے استعمال اور بانس کی سکیف فولڈنگ نے اہم کردار ادا کیا۔ پولیس کا کہنا ہے کہ یہ مواد عمارتوں کے درمیان آگ کو تیزی سے پھیلانے میں معاون ثابت ہوا۔
ریسکیو آپریشنز جاری ہیں اور حکام نے مقامی عوام کو خبردار کیا ہے کہ متاثرہ علاقوں میں داخل نہ ہوں اور اپنی حفاظت کے اقدامات جاری رکھیں۔
