بلوچستان میں سردی کی شدت میں اضافہ برقرار ہے اور زیادہ تر اضلاع میں موسم سرد اور خشک رہنے کا امکان ہے۔ محکمہ موسمیات کے مطابق بعض بالائی علاقوں میں درجہ حرارت نقطۂ انجماد سے بھی نیچے جاچکا ہے، جبکہ کم سے کم درجہ حرارت میں نمایاں کمی ریکارڈ کی گئی ہے۔
تفصیلات کے مطابق کوئٹہ میں کم سے کم درجہ حرارت صفر ڈگری سینٹی گریڈ ریکارڈ کیا گیا، جبکہ قلات میں پارہ منفی 1 ڈگری تک گر گیا۔ کوئٹہ کے بالائی علاقوں اور زیارت میں شدید سردی جاری ہے اور درجہ حرارت منفی 5 ڈگری سینٹی گریڈ تک پہنچ گیا۔ ژوب میں کم سے کم درجہ حرارت 5 ڈگری سینٹی گریڈ ریکارڈ ہوا۔
بلوچستان کے دیگر اضلاع میں بھی سردی کی لہر برقرار ہے۔ سبی میں کم سے کم درجہ حرارت 13 ڈگری، تربت میں 15 ڈگری، نوکنڈی میں 8 ڈگری جبکہ چمن میں 4 ڈگری سینٹی گریڈ ریکارڈ کیا گیا۔
ساحلی اضلاع بھی سرد موسم کی لپیٹ میں ہیں۔ گوادر میں کم سے کم درجہ حرارت 14 ڈگری جبکہ جیوانی میں 17 ڈگری سینٹی گریڈ ریکارڈ کیا گیا۔
ماہرین موسمیات کے مطابق آئندہ 24 گھنٹوں کے دوران بلوچستان کے بیشتر اضلاع میں موسم خشک رہے گا جبکہ شمالی علاقوں میں شدید سردی برقرار رہنے کی پیشگوئی ہے۔ شہریوں کو موسم کی مناسبت سے احتیاطی تدابیر اختیار کرنے کی ہدایت کی گئی ہے۔
