تربت میں ڈپٹی کمشنر کیچ بشیر احمد بڑیچ کے قافلے کو بم دھماکے کا نشانہ بنایا گیا۔ پولیس کے مطابق واقعہ تھانہ روڈ پر اس وقت پیش آیا جب ڈی سی کیچ اپنے گھر سے دفتر جا رہے تھے۔
ذرائع کے مطابق دھماکہ موٹر سائیکل میں نصب ریموٹ کنٹرول بم کے ذریعے کیا گیا۔ دھماکے کے نتیجے میں ڈی سی بشیر احمد بڑیچ محفوظ رہے تاہم نو لیویز اہلکاروں سمیت دس افراد زخمی ہوگئے، جن میں سے دو کی حالت تشویشناک بتائی جا رہی ہے۔
زخمیوں میں لیویز اہلکار شبیر احمد ولد گل محمد، نظام الدین ولد نظر محمد، راجہ احمد ولد الله داد، عبدالغفار ولد محمد حسین، بلال احمد ولد ارباب، صدام حسین ولد نور محمد، عباس ولد عبدالنبی، نصیر احمد ولد عبدالمنان، مزار ولد واحد بخش اور ایک راہ گیر عدیل احمد ولد حضور بخش شامل ہیں۔
دھماکے کے فوراً بعد لیویز فورس اور پولیس موقع پر پہنچ گئیں اور تمام زخمیوں کو ٹیچنگ اسپتال تربت منتقل کر دیا گیا۔
ابتدائی اطلاعات کے مطابق دھماکے سے ڈی سی کی اسکواڈ میں شامل ایک گاڑی کو شدید نقصان پہنچا جبکہ قریب کھڑی تین دیگر گاڑیاں بھی متاثر ہوئیں۔
دھماکہ اس علاقے میں ہوا جہاں گاڑیوں کی خرید و فروخت کا مرکز واقع ہے۔
ابتدائی طور پر حکام کا کہنا ہے کہ دھماکہ ریموٹ کنٹرول ڈیوائس کے ذریعے کیا گیا۔ ابھی تک کسی نے واقعے کی ذمہ داری قبول نہیں کی۔
