خضدار ( مانیٹرنگ ڈیسک ) بلوچ یکجہتی کمیٹی خضدار زون کے ترجمان نے جاری بیان میں کہاہے کہ
گزشتہ رات تقریباً 2 بجے، سرکاری سرپرستی میں پلنے والے سردار ثناء اللہ زہری کے نائب، رحیم بخش، نے چادر اور چار دیواری کا تقدس پامال کرتے ہوئے خواتین کو جبری طور پر اغوا کر لیا۔ اس ظلم کے خلاف متاثرہ خاندان نے صبح 4 بجے خضدار کے مقام سنی سبزی منڈی میں مین آر سی ڈی روڈ کو بلاک کر دیا۔
انھوں نے کہاہے کہ بلوچ یکجہتی کمیٹی خضدار زون اس غیر انسانی اور ظالمانہ اقدام کی سخت الفاظ میں مذمت کرتے ہوئے احتجاج کرنے والے خاندان کے ساتھ مکمل یکجہتی کا اعلان کرتی ہے۔ ہم مطالبہ کرتے ہیں کہ اغوا شدہ خواتین کو فوری طور پر بازیاب کرایا جائے اور اس واقعے میں ملوث تمام عناصر کے خلاف سخت کارروائی کی جائے۔
ترجمان نے کہاہے کہ ہم خضدار کے عوام سے اپیل کرتے ہیں کہ وہ اس ظلم کے خلاف آواز بلند کریں، احتجاج میں بھرپور شرکت کریں اور متاثرہ خاندان کے ساتھ یکجہتی کا اظہار کریں۔
