ایران کوئلہ کی کان میں دھماکہ 51مزدور ھلاک 20 زخمی ہوگئے ،ایران کے سرکاری میڈیا کے مطابق ملک کے مشرقی حصے میں واقع ایک کوئلے کی کان میں دھماکے سے کم از کم 51 افراد ہلاک ہو گئے ہیں۔ابتدائی رپورٹوں کے مطابق اس واقعے میں ہلاکتوں کی تعداد تیس اور زخمیوں کی سترہ بتائی گئی تھی۔
تاہم ایران کی سرکاری نیوز ایجنسی ارنا کی ایک اپڈیٹ میں بتایا گیا ہے کہ دھماکے سے ہونے والی ہلاکتوں کی تعداد بڑھ کر اب 51 اور زخمیوں کی تعداد 20 ہو گئی ہے۔ملکی دارالحکومت تہران سے جنوب مشرق کی طرف تقریبا540 کلومیٹر دور طبس میں واقع کوئلے کی کان میں دھماکہ ہفتے کی رات مقامی وقت کے مطابق نو بجے کے قریب ہوا۔ اس دھماکے کی وجہ کان کے دو بلاکس میں میتھین گیس کی لیکیج بتائی جا رہی ہے۔
سرکاری میڈیا کے مطابق دھماکے کے وقت ان دونوں بلاکس میں مجموعی طور پر 69 ورکرز موجود تھے۔ایرانی صدر مسعود پزشکیان نے دھماکے میں ہونے والی ہلاکتوں پر افسوس کا اظہار کیا ہے۔ انہوں نے کان میں پھنسے ورکرز اور لاشوں کو نکالنے کے ساتھ ساتھ اس واقعے کی تحقیقات کے احکامات بھی جاری کیے ہیں۔
تاہم مقامی پراسیکیوٹر علی نسائی کے مطابق کان میں گیس بھر جانے کی وجہ سے ریسکیو اہلکاروں کو مشکل کا سامنا ہو رہا ہے۔ ارنا کے مطابق انہوں نے کہا،اس وقت ہماری ترجیح زخمیوں کو امداد پہنچانا اور لوگوں کو ملبے سے نکالنا ہے۔
