بلوچستان کے ضلع قلات کے پہاڑی سلسلوں میں پاکستان فوج کی جانب سے فوج کشی کی جارہی ہے، مختلف مقامات پر ہیلی کاپٹروں کے ذریعے کمانڈوز اتارے گئے ہیں۔
اطلاعات کے مطابق ہربوئی کے علاقے کرگزی، خیسن بند، پودگلی، سرخین، کاکڑی، جوہان، نرمک کے علاقوں میں فوج کشی جاری ہے۔
علاقے میں فوج کشی کی وجہ سے مزید تفصیلات تک رسائی ممکن نہیں ہو پارہی ہے ۔
دوسری جانب ہرنائی میں فرنٹیئر کور ایف سی نے دعوی کیاہے کہ 11 ستمبر کو ہرنائی میں ایف سی بلوچستان نے فوج کشی کرتے ہوئے 7 افراد کو ھلاک کردیا ہے ۔ اور بڑی تعداد میں اسلحہ اور گولہ بارود قبضے میں لیا ہے۔
ادھر آواران فورسز اور مسلح افراد کے درمیان شدید جھڑپ کی اطلاعات ہیں ۔
اطلاعات کے مطابق آواران کے علاقے پیراندر میں آج صبح مسلح افراد اور فورسز کے درمیان شدید جھڑپ ہوئی ہے جس میں فورسز کے متعدد اہلکار ہلاک و زخمی ہوگئے ہیں جب کہ ایک فوجی آفیسر کے زخمی ہونے کی اطلاعات بھی سامنے آرہی ہیں۔
بتایا جا رہا ہے کہ حملہ کافی شدید تھا جو گھنٹوں تک جاری رہا ۔
واضح رہے کہ آواران میں 24 گھنٹوں کے اندر یہ دوسرا بڑا حملہ ہے کہ مسلح افراد پاکستانی فورسز کو شدید حملے کا نشانہ بنا رہے ہیں۔
تاہم تاحال کسی تنظیم نے ان شدید حملوں کی ذمہ داری قبول نہیں کی ہے ۔
