بلوچستان کے ضلع کیچ کے انتظامی مرکز تربت کے نواحی علاقے آبسر میں گھات لگائے مسلح افراد نے ایک نجی گاڑی پر فائرنگ کردی۔
فائرنگ کے نتیجے میں گاڑی میں سوار ڈیوٹی پر مامور لیڈی کانسٹیبل موقع پر ہلاک ہوگئیں، جبکہ ان کے شوہر اور 5 سالہ بیٹا شدید زخمی ہوگئے۔
پولیس اور قانون نافذ کرنے والے اداروں نے جائے وقوعہ پر پہنچ کر لاش اور زخمیوں کو قریبی ہسپتال منتقل کردیا۔ ہسپتال ذرائع کے مطابق زخمی بچے اور اس کے والد کی حالت تشویشناک بتائی جا رہی ہے۔
پولیس حکام کا کہنا ہے کہ مقتولہ محکمہ پولیس میں خدمات انجام دے رہی تھیں جبکہ ابتدائی طور پر واقعہ ٹارگٹ کلنگ معلوم ہوتا ہے۔ واقعے کی تحقیقات جاری ہیں۔
