وائس فار بلوچ مسنگ پرسنز (وی بی ایم پی) کے زیر اہتمام جبری گمشدگیوں کے خلاف قائم احتجاجی کیمپ کو آج کوئٹہ پریس کلب کے سامنے 5096 دن مکمل ہوگئے۔
احتجاجی کیمپ کے دوران مختلف مکاتبِ فکر سے تعلق رکھنے والے افراد نے شرکت کر کے اظہارِ یکجہتی کیا اور جبری گمشدگیوں کے خلاف اپنا احتجاج ریکارڈ کرایا۔ شرکاء نے جبری گمشدگیوں کے فوری خاتمے اور لاپتہ افراد کی بازیابی کا مطالبہ کیا۔
وی بی ایم پی کے چیئرمین نصراللہ بلوچ نے اس موقع پر کہا کہ ایک شخص کی جبری گمشدگی پورے خاندان کو کرب اور اذیت میں مبتلا کر دیتی ہے، جس سے ان کی زندگی مفلوج ہو کر رہ جاتی ہے۔ انہوں نے حکومت اور ملکی اداروں کے سربراہوں سے اپیل کی کہ وہ جبری گمشدگیوں کے مسئلے کو انسانی ہمدردی کی بنیاد پر دیکھیں اور اس کے مکمل سدباب کے لیے عملی اقدامات کریں۔
انہوں نے مطالبہ کیا کہ ملکی قوانین کے تحت اقدامات اٹھا کر لاپتہ افراد کی بازیابی کو یقینی بنایا جائے اور متاثرہ خاندانوں کو طویل اذیت سے نجات دلائی جائے۔
