بلوچستان کے ضلع پنجگور کے علاقے سوراپ میں گزشتہ روز پاکستانی فورسز اور مسلح افراد کے درمیان تقریباً سات گھنٹوں تک شدید جھڑپوں کی اطلاعات موصول ہوئی ہیں۔
مقامی ذرائع کے مطابق جھڑپوں کے دوران پاکستانی فورسز کو جانی نقصان اٹھانا پڑا، جن میں صوبیدار یوسف کے ہلاک ہونے کی اطلاعات ہیں، جبکہ متعدد اہلکار زخمی بھی ہوئے ہیں۔ ذرائع کا کہنا ہے کہ جھڑپوں میں کمانڈوز کو بھی بھاری نقصان اٹھانا پڑا، تاہم ہلاکتوں اور زخمیوں کی حتمی تعداد کی تصدیق نہیں ہو سکی۔
ذرائع کے مطابق علاقے میں بڑے پیمانے پر جاری آپریشن میں فوج کے ساتھ مقامی ڈیتھ اسکواڈ کے کارندے بھی شریک ہیں۔
تاحال اس واقعے کے حوالے سے نہ تو سرکاری حکام اور نہ ہی کسی بلوچ مسلح تنظیم کی جانب سے کوئی باضابطہ بیان سامنے آیا ہے، جس کے باعث صورتحال سے متعلق مزید تفصیلات واضح نہیں ہو سکیں۔
واضح رہے کہ بلوچستان کے مختلف علاقوں میں پاکستانی فورسز اور مسلح افراد کے درمیان جھڑپوں اور فوجی آپریشنز کے واقعات مسلسل رپورٹ ہو رہے ہیں، جن کے باعث علاقے میں صورتحال مسلسل کشیدہ ہے۔
