بلوچستان کے ضلع آواران کے علاقے پیراندر میں پاکستانی فورسز کو آئی ای ڈی دھماکے میں نشانہ بنایا گیا، جس کے نتیجے میں تین اہلکار ہلاک جبکہ ایک شدید زخمی ہوگیا۔
پاکستانی ذرائع کے مطابق دھماکے میں نائیک دین محمد، سپاہی عرفان اور عدنان موقع پر ہی ہلاک ہوگئے، جبکہ لانس نائیک یونس شدید زخمی ہوا جسے فوری طور پر طبی امداد کے لیے قریبی اسپتال منتقل کردیا گیا۔
واقعے کے بعد علاقے میں سرچ آپریشن شروع کردیا گیا ہے جبکہ سیکیورٹی مزید سخت کردی گئی ہے۔
بلوچستان کے ضلع کیچ کے علاقے تمپ نذرآباد میں زبیدہ جلال مین روڈ پر دھماکوں اور فائرنگ کی آوازیں سنی گئیں۔
ذرائع کے مطابق فائرنگ فوج کی لائٹ کمانڈو بٹالین کے قافلے پر کی گئی، جو فوجی آپریشن کی غرض سے جنوبی پہاڑی علاقوں کی جانب روانہ تھا۔ سرکاری ذرائع کا کہنا ہے کہ حملہ آوروں نے پہاڑی علاقے سے قافلے کو نشانہ بنایا۔
واقعے کے بعد تمپ سے فرنٹیئر کور (ایف سی) کا ایک قافلہ امدادی کارروائی کے لیے جائے وقوعہ کی جانب روانہ کردیا گیا۔ ابتدائی اطلاعات کے مطابق حملے میں دو اہلکار زخمی ہوئے ہیں جبکہ علاقے میں سیکیورٹی سخت کردی گئی ہے۔
واضح رہے کہ مذکورہ علاقے میں گزشتہ روز سے مسلح افراد کی موجودگی کی اطلاعات تھیں، جنہوں نے مختلف مقامات پر ناکہ بندیاں قائم کیں، اسنیپ چیکنگ کی اور ایک مواصلاتی ٹاور کو تباہ کردیا تھا۔ مسلح افراد دو گاڑیاں بھی قبضے میں لے کر اپنے ہمراہ لے گئے تھے۔
