بلوچستان کے ضلع پنجگور کے علاقے چتکان بازار میں جامعہ مسجد روڈ کے قریب زور دار دھماکے کے نتیجے میں ایک شخص ہلاک جبکہ دو بچوں سمیت 12 افراد زخمی ہو گئے۔ دھماکہ اتنا شدید تھا کہ اس کی آواز دور دور تک سنی گئی اور پورا شہر لرز اٹھا۔ واقعے کے فوراً بعد بازار کی بیشتر دکانیں بند کر دی گئیں۔
دھماکے کی اطلاع ملتے ہی پولیس اور دیگر قانون نافذ کرنے والے ادارے جائے وقوعہ پر پہنچ گئے اور علاقے کو گھیرے میں لے کر شواہد اکٹھے کرنا شروع کر دیے۔ زخمیوں کو فوری طور پر قریبی اسپتال منتقل کر دیا گیا جہاں بعض کی حالت تشویشناک بتائی جا رہی ہے۔
ابتدائی اطلاعات کے مطابق دھماکے کی نوعیت تاحال معلوم نہیں ہو سکی، تاہم خدشہ ظاہر کیا جا رہا ہے کہ دھماکہ موٹر سائیکل میں نصب بارودی مواد کے ذریعے کیا گیا۔
دوسری جانب تربت کے علاقے ہوشاب بازار میں نامعلوم مسلح موٹر سائیکل سوار افراد کی فائرنگ سے رائی ولد عیسیٰ ہلاک ہو گئے۔ پولیس کے مطابق واقعہ اس وقت پیش آیا جب مقتول اپنی دکان کے سامنے گاڑی میں بیٹھے ہوئے تھے۔ حملہ آور فائرنگ کے بعد موقع سے فرار ہو گئے۔
قتل کے محرقات تاحال معلوم نہیں ہوسکا ہے۔
