ہرنائی میں گزشتہ روز برآمد ہونے والی چوتھی لاش کی بھی شناخت ہو گئی ہے۔ مقامی ذرائع کے مطابق برآمد لاش کی شناخت علی اکبر سمالاڑی ولد علی نواز سمالاڑی کے نام سے ہوئی ہے، جنہیں اہلِ خانہ کے مطابق سات ماہ قبل ہرنائی کے علاقے کھوسٹ سے پاکستانی فورسز نے ان کے گھر سے حراست میں لے کر جبری طور پر لاپتہ کیا تھا۔
اس سے قبل برآمد ہونے والی تین لاشوں کی بھی شناخت ہو چکی ہے۔ مقتولین میں ایک کی شناخت جمعہ خان چھلگری مری ولد کیچو خان کے نام سے ہوئی ہے، جو کوریاک سپن تنگی، ضلع ہرنائی کا رہائشی تھا۔ اہلِ خانہ کا کہنا ہے کہ جمعہ خان کو ایک سال قبل ہرنائی بازار سے پاکستانی فورسز نے حراست میں لیا تھا، جس کے بعد سے وہ لاپتہ تھا۔
دیگر دو مقتولین کی شناخت نور محمد، سکنہ بابر کچ کوٹ منڈئی ضلع سبی، اور محمد رسول کے نام سے ہوئی ہے۔ تاہم نور محمد اور محمد رسول کے حوالے سے تاحال یہ تصدیق نہیں ہو سکی کہ آیا وہ پہلے سے جبری طور پر لاپتہ تھے یا نہیں۔
لاشوں کی برآمدگی کے بعد علاقے میں خوف و ہراس پھیل گیا ہے جبکہ لواحقین نے واقعے کی شفاف تحقیقات اور ذمہ داروں کے خلاف کارروائی کا مطالبہ کیا ہے۔
