بلوچستان کے ضلع مستونگ میں مسلح افراد نے پاکستانی فورسز کو ایک حملے میں نشانہ بنایا، جس کے نتیجے میں علاقے میں کئی گھنٹوں تک جھڑپیں جاری رہیں۔ مقامی ذرائع کے مطابق فرنٹیئر کور کا ایک اہلکار حملہ آوروں کے ہاتھوں گرفتار کرلیا گیا ہے۔
واقعہ دشت، عمر ڈور کے علاقے زہری گٹ میں اُس وقت پیش آیا جب فورسز پیدل پیش قدمی کی کوشش کر رہی تھیں۔ اسی دوران دونوں جانب سے شدید فائرنگ کا تبادلہ شروع ہوا جو دو گھنٹوں سے زائد جاری رہا۔ جھڑپوں کے دوران علاقے میں بھاری ہتھیاروں کی فائرنگ اور دھماکوں کی آوازیں بھی سنی گئیں۔
علاقائی ذرائع نے بتایا کہ حملے میں فورسز کو جانی نقصان بھی ہوا ہے، تاہم اس کی تفصیلات تاحال سامنے نہیں آ سکیں۔
عینی شاہدین کے مطابق جھڑپ کے وقت علاقے میں ہیلی کاپٹروں کی پروازیں بھی دیکھی گئیں، لیکن حکام نے اس حوالے سے کوئی سرکاری بیان جاری نہیں کیا۔
