بلوچستان کے ضلع پنجگور اور کراچی میں پاکستانی فورسز کی کارروائیوں کے دوران مزید چھ بلوچ شہریوں کو حراست میں لیے جانے اور مبینہ طور پر نامعلوم مقامات پر منتقل کیے جانے کی اطلاعات موصول ہوئی ہیں۔
تفصیلات کے مطابق پنجگور کی تحصیل پروم میں پاکستانی فورسز نے کارروائی کرتے ہوئے پانچ افراد عبدالغفار ولد ملنگ، حامد ولد داد محمد، مجید ولد رشید اور مری قبیلے سے تعلق رکھنے والے مزید دو افراد کو گرفتار کیا۔ مذکورہ افراد محنت مزدوری کے سلسلے میں پروم میں رہائش پذیر تھے۔
اسی نوعیت کی ایک کارروائی کراچی کے علاقے لیاری سرگوات میں بھی پیش آئی، جہاں رکشہ ڈرائیور شاہ زیب صمد کو پاکستانی فورسز نے حراست میں لے کر مبینہ طور پر لاپتہ کردیا گیا۔
لاپتہ افراد کے اہلِ خانہ نے اپنے پیاروں کی فوری بازیابی کی اپیل کرتے ہوئے کہا ہے کہ اگر وہ کسی الزام کا سامنا کر رہے ہیں تو انہیں عدالتوں میں پیش کیا جائے، بجائے اس کے کہ انہیں بےنام مقامات پر رکھا جائے۔
