قلعہ عبداللہ: قبرستان کے قریب واقع لیویز چوکی پر حملے کے نتیجے میں چوکی انچارج دفعدار سعد اللہ فائرنگ سے ہلاک ہوگئے۔ واقعہ کی تصدیق مقامی ذرائع نے کی ہے۔
عینی شاہدین کے مطابق فائرنگ کا تبادلہ اس وقت شروع ہوا جب علاقے کے رہائشی فقیر اچکزئی اور ان کے ساتھیوں کی گاڑی لیویز اہلکاروں کی جانب سے روکی گئی، جس کے بعد دونوں جانب سے گولیاں چلیں۔
فقیر اچکزئی نے دعویٰ کیا ہے کہ وہ اپنے ساتھیوں کے ہمراہ فاتحہ خوانی کے لیے جا رہے تھے کہ اچانک لیویز فورس نے بلا اشتعال فائرنگ کر دی جس کے نتیجے میں ان کے دو ساتھی موقع پر ہی ہلاک ہوگئے۔ دوسری جانب لیویز حکام کا مؤقف ہے کہ گاڑی نے چیکنگ کے احکامات نظر انداز کیے اور فائرنگ پہلے حملہ آوروں کی جانب سے کی گئی۔
واقعے کے بعد علاقے میں کشیدگی برقرار ہے جبکہ کوئٹہ–چمن شاہراہ قلعہ عبداللہ کے مقام پر مکمل طور پر ٹریفک کے لیے بند کر دی گئی، جس کے باعث گاڑیوں کی طویل قطاریں لگ گئیں۔
