زیارت کے نواحی علاقے میں گزشتہ رات نامعلوم مسلح افراد نے ایک تعمیراتی کمپنی کے کیمپ پر دھاوا بول کر سائٹ فارمین کو اغوا کر لیا اور قیمتی مشینری و رہائشی کوارٹرز کو آگ لگا دی۔
عینی شاہدین کے مطابق حملہ آوروں کی تعداد چار سے پانچ تھی۔ رات گئے کیمپ میں داخل ہونے کے بعد انہوں نے عملے کے دیگر افراد کو کمروں میں بند کر دیا اور سائٹ فارمین کو زبردستی اپنے ساتھ لے گئے۔ اس دوران حملہ آوروں نے مشینری، گاڑیاں اور رہائشی کوارٹرز کو آگ لگا دی، جس کے نتیجے میں کیمپ میں موجود قیمتی آلات مکمل طور پر جل کر خاکستر ہو گئے۔
متاثرہ کمپنی کے نمائندوں نے بتایا کہ متعدد بار لیویز فورس سے سیکیورٹی فراہم کرنے کی درخواستیں کی گئیں، لیکن کوئی اہلکار تعینات نہیں کیا گیا، جس کے باعث یہ واقعہ پیش آیا۔ کمپنی انتظامیہ نے ضلعی انتظامیہ اور اعلیٰ حکام سے فوری کارروائی اور مغوی کی بازیابی کا مطالبہ کیا ہے۔
ضلعی انتظامیہ کے ایک اہلکار نے کہا کہ واقعے کی تحقیقات شروع کر دی گئی ہیں اور مغوی کی تلاش کے لیے لیویز اور پولیس کی مشترکہ ٹیمیں علاقے میں روانہ کر دی گئی ہیں۔
