بلوچستان کے علاقوں دشت اور پسنی میں پاکستانی فورسز پر حملے میں فورسز کو جانی و مالی نقصان کا سامنا کرنا پڑا ہے۔ جبکہ ناکہ بندی کے دوران بوزر گاڑی کو نذر آتش کردیا گیا ہے۔
ذرائع کے مطابق دشت کے علاقے کھڈان میں آج شام مسلح افراد نے پاکستانی فوج کے اہلکاروں کو اس وقت نشانہ بنایا جب وہ اپنے کیمپ کے لیے رسد گاڑی سے اتار رہے تھے۔ حملے کے نتیجے میں اہلکاروں کو جانی نقصان کا سامنا کرنا پڑا ہے۔
حملے کے دوران کیمپ کے قریب نصب نگرانی ٹاور کو نقصان پہنچا دیا گیا، ٹاور پر نصب کیمرے تباہ کر دیے گئے اور مشینری کو آگ لگا دی گئی۔
دوسری جانب بلوچستان کے ساحلی شہر پسنی کے علاقے شتنگی میں آج مغرب کے وقت نامعلوم مسلح افراد نے کوسٹل ہائی وے پر ناکہ بندی کر کے گاڑیوں کی تلاشی لی۔ اسی دوران حملہ آوروں نے ایک بوزر گاڑی کو آگ لگا دی۔
عینی شاہدین کے مطابق موقع پر موجود ایک مسلح شخص سے حملہ آوروں نے اسلحہ بھی ضبط کیا، تاہم واقعے میں کسی جانی نقصان کی اطلاع نہیں ملی۔
حملوں کی ذمہ داری تاحال کسی تنظیم نے قبول نہیں کی ہے۔
