فری بلوچستان موومنٹ (ایف بی ایم) کی جرمن برانچ کے رکن مالک بلوچ طویل علالت کے بعد انتقال کر گئے۔ پارٹی ذرائع کے مطابق مرحوم گزشتہ تقریباً دو برس سے کینسر کے مرض میں مبتلا تھے اور جرمنی کے شہر ہنوفر کے ایک اسپتال میں زیرِ علاج تھے۔
مالک بلوچ کا تعلق بلوچستان کے علاقے مہیر مند سے تھا۔ وہ پاکستانی فورسز کے بڑھتے ہوئے جبر و تشدد سے تنگ آکر 2015 کے دوران جرمنی میں پناہ گزین بن گئے تھے، جہاں وہ بلوچ قومی تحریک سے وابستہ سرگرمیوں میں متحرک رہے۔
پارٹی ذرائع کا کہنا ہے کہ قانونی کارروائی مکمل ہونے کے بعد مرحوم کی تدفین جرمنی میں ہی کی جائے گی۔ متوفی کے جنازے کا مقام اور وقت تاحال طے نہیں کیا جا سکا۔
ان کے انتقال پر سیاسی و سماجی کارکنان نے گہرے دکھ اور افسوس کا اظہار کیا ہے اور بلوچ تحریک میں ان کی خدمات کو خراجِ تحسین پیش کیا ہے۔
