بلوچستان کے علاقے مند بلوچ آباد میں پاکستانی فورسز کے ہاتھوں جبری لاپتہ نوجوانوں کی گمشدگی کے خلاف اہلِ خانہ نے احتجاجی ریلی نکالنے کا اعلان کیا ہے۔ ریلی کل صبح 11 بجے نکالی جائے گی۔
ذرائع کے مطابق گزشتہ روز 23 اکتوبر کو پاکستانی فوج نے مند کے مختلف علاقوں میں گھروں پر چھاپے مارے، جس دوران تین نوجوانوں ہارون ولد محمد جان، حمود ولد محمد جان، اور فہد ولد عثمان کو حراست میں لے کر جبری طور پر لاپتہ کردیا گیا۔ تینوں نوجوانوں کو حراست میں لینے کے بعد نامعلوم مقام پر منتقل کردیا گیا ہے، جبکہ اہلِ خانہ کو اس بارے میں کسی قسم کی اطلاع یا قانونی دستاویز فراہم نہیں کی گئی۔
اہلِ خانہ کے مطابق جبری گمشدگیوں کے خلاف یہ احتجاجی ریلی 26 اکتوبر کو بلوچ آباد سے سورو بار تک نکالی جائے گی، جو بعد ازاں دھرنے کی شکل اختیار کرے گی۔
لواحقین نے مند اور ملحقہ علاقوں کے تمام افراد سے اپیل کی ہے کہ وہ بڑی تعداد میں شرکت کر کے جبری گمشدگیوں کے خلاف آواز بلند کریں۔
