نوشکی کے علاقے مغربی بائی پاس پر نامعلوم مسلح افراد نے پولیس اہلکاروں پر فائرنگ کر دی، جس کے نتیجے میں دو پولیس اہلکار موقع پر ہی ہلاک ہوگئے۔
پولیس ذرائع کے مطابق حملہ آور فائرنگ کے بعد موقع سے فرار ہونے میں کامیاب ہوگئے۔ واقعے کے بعد پولیس کی بھاری نفری نے جائے وقوعہ کو گھیرے میں لے کر شواہد اکٹھے کرنا شروع کر دیے ہیں۔
ہلاک ہونے والے اہلکاروں کی شناخت عبیداللہ ساکن بٹو لانڈھی اور عبدالرزاق ساکن غریب آباد کے نام سے ہوئی ہے۔
پولیس ذرائع کے مطابق دونوں اہلکاروں کی لاشوں کو ضابطے کی کارروائی کے لیے اسپتال منتقل کر دیا گیا ہے، جب کہ ملزمان کی گرفتاری کے لیے علاقے میں سرچ آپریشن شروع کر دیا گیا ہے۔
