ڈیرہ بگٹی سے تعلق رکھنے والے تین جبری لاپتہ افراد کی لاشیں صحبت پور سے برآمد ہوئی ہیں۔ ذرائع کے مطابق گزشتہ رات سی ٹی ڈی نے ایک مبینہ مقابلے میں تین افراد کو ہلاک کیا، تاہم مقامی لوگوں اور لواحقین نے اسے جعلی مقابلہ قرار دیا ہے۔
ہلاک ہونے والوں میں دو کی شناخت جمیل ولد خاوند بخش بگٹی اور پیر جان ولد کرمان بگٹی کے ناموں سے ہوئی ہے، جو ڈیرہ بگٹی کے نواب بازار اور بگٹی قبیلے کی ذیلی شاخ مریٹہ سے تعلق رکھتے تھے۔ تیسرے شخص کی شناخت حاضر بگٹی کے نام سے ہوئی ہے، تاہم اس کے بارے میں مزید تفصیلات سامنے نہیں آ سکیں۔
ذرائع کے مطابق جمیل بگٹی اور پیر جان بگٹی کو 19 مارچ 2025 کو ڈیرہ بگٹی شہر سے پاکستانی فورسز اور آئی ایس آئی اہلکاروں نے جبری طور پر لاپتہ کیا تھا۔
یاد رہے کہ اس سے قبل بھی رواں سال 12 جون کو سوئی میں سی ٹی ڈی نے مبینہ جعلی مقابلے کے دوران پہلے سے لاپتہ تین نوجوانوں کو ہلاک کر دیا تھا۔ ان کی شناخت یوسف ولد شاہ نواز بگٹی، علی بیگ ولد پاپی بگٹی اور زاہد ولد عثمان بگٹی کے ناموں سے ہوئی تھی۔
