افغانستان کے صوبہ پکتیکا کے اضلاع ارغون اور برمل میں پاکستانی فضائی حملوں کے نتیجے میں تین کرکٹ کھلاڑیوں سمیت متعدد افراد جاں بحق اور زخمی ہوگئے ہیں۔ افغان ذرائع کے مطابق حملوں میں خواتین اور بچے بھی شامل ہیں۔
اطلاعات کے مطابق فضائی کارروائیاں ارغون اور برمل کے کئی علاقوں میں کی گئیں، جن میں تین کرکٹ کھلاڑی بھی جاں بحق ہوئے۔ افغان کرکٹ بورڈ (اے سی بی) نے تصدیق کی ہے کہ کھلاڑی صوبائی دارالحکومت شرانہ سے دوستانہ میچ کھیلنے کے بعد واپسی پر نشانہ بنے۔
افغان کرکٹ بورڈ کے مطابق ارغون سے تعلق رکھنے والے کھلاڑی کبیر، صبغت اللہ اور ہارون سمیت پانچ افراد جاں بحق جبکہ سات زخمی ہوئے۔ اے سی بی نے اپنے بیان میں کہا:
“ہم صوبہ پکتیکا کے ضلع ارغون سے تعلق رکھنے والے بہادر کرکٹرز کی المناک ہلاکت پر گہرے رنج و غم کا اظہار کرتے ہیں، جنہیں پاکستانی حملے میں نشانہ بنایا گیا۔
اس واقعے کے بعد افغانستان نے آئندہ ماہ نومبر میں پاکستان میں شیڈول سہ فریقی ٹی ٹوئنٹی سیریز سے دستبرداری کا اعلان کردیا ہے۔ اس سیریز میں میزبان پاکستان کے علاوہ سری لنکا اور افغانستان کی ٹیموں نے حصہ لینا تھا۔
افغانستان کرکٹ ٹیم کے کپتان راشد خان، سابق کپتان محمد نبی اور دیگر کھلاڑیوں نے بھی اس حملے کی شدید مذمت کی ہے۔
