کراچی : معروف عالم دین اور کراچی میں الیوسف اسلامک اکیڈمی کے سربراہ مولانا عبدالسلام عارف کے ساتھ بلوچ یکجہتی کمیٹی کی خصوصی نشست ہوئی جس میں بلوچ قوم کی نسل کشی اور جبری گمشدگیوں پر بلوچ علماء کے کردار اور ان سے توقعات پر شرکاء نے تفصیلی گفتگو کی۔
یہ نشست لیاری کے محلہ غریب شاہ میں منعقد کی گئی جس کی صدارت بی وائی سی کے رہنماء لالا عبدالوہاب نے کی جس میں بی وائی سی گوادر کے سرکردہ رکن عبداللہ بلوچ اور انسانی حقوق کے متحرک کارکن زاہد بگٹی بھی موجود تھے۔
نشست میں شرکاء نے کہا یہ نشست بلوچ مذہبی رہنماؤں سے یہ تقاضا کرتی ہے کہ وہ ہر پلیٹ فارم بلوچ نسل کشی اور جبری گمشدگی پر آواز اٹھائیں۔ وہ پاکستان کے تمام مدارس میں اس ظلم کے خلاف رائے سازی کے لیے کردار ادا کریں اور انھیں آگاہ کریں کہ بلوچستان میں انسانی حقوق کی بدترین پامالی ہو رہی ہے اور لوگ قتل کیے جا رہے ہیں۔
پروگرام کے منتظمین نے مولانا عبدالسلام عارف کے کردار کی تعریف کرتے ہوئے کہا مولانا عبدالسلام عارف کراچی میں بلوچ نسل کشی کے خلاف ایک توانا آواز ہیں۔ ہم آئندہ بھی امید رکھتے ہیں کہ آپ ہمیشہ کی طرح ہمارے کاروان کا حصہ ہوں گے۔
اس موقع پر بجلی منقطع ہونے کی وجہ سے پروگرام کی تصاویر اور ویڈیوز حاصل نہیں کیے جاسکے۔
