افغانستان میں انٹرنیٹ اور موبائل نیٹ ورک سروسز دوسرے روز بدستور شدید متاثر ہیں اور ملک کے بیشتر حصوں میں شہریوں کا بیرونی دنیا سے رابطہ منقطع ہے۔ رپورٹوں کے مطابق موبائل ڈیٹا، وائی فائی اور فائبر آپٹک سروسز تقریباً معطل ہو چکی ہیں، جبکہ کنکٹیوٹی ایک فیصد سے بھی کم رہ گئی ہے۔
متعدد ذرائع کا کہنا ہے کہ طالبان حکام نے فائبر آپٹک انٹرنیٹ بند کرنے کا حکم دیا ہے، جس کی وجہ “غیر اخلاقی مواد” کی روک تھام بتائی گئی۔ تاہم حکومت کی جانب سے بعض نمائندوں نے دعویٰ کیا ہے کہ ملک بھر میں مکمل شٹ ڈاؤن نہیں کیا گیا بلکہ مسئلہ پرانے فائبر کیبلز کی خرابی کے باعث پیدا ہوا ہے۔
انٹرنیٹ معطلی کے باعث عوام، صحافیوں، تعلیمی اداروں، کاروباری مراکز اور بین الاقوامی تنظیموں کو شدید مشکلات کا سامنا ہے۔ مختلف شہروں سے لوگوں نے شکایت کی ہے کہ نہ رابطہ ممکن ہے اور نہ اطلاعات تک رسائی، جس سے صورتِ حال مزید تشویشناک ہو رہی ہے۔
طالبان حکومت نے ملک گیر بندش کی تردید کرتے ہوئے کہا ہے کہ تکنیکی مسائل حل کیے جا رہے ہیں، لیکن غیر جانب دار ذرائع اس بات کی تصدیق کر رہے ہیں کہ کنکٹیوٹی تقریباً ختم ہو چکی ہے اور صورتحال معمول پر آنے کے آثار تاحال دکھائی نہیں دیتے۔
