بلوچستان کے علاقوں پنجگور اور جھل مگسی میں فائرنگ کے دو مختلف واقعات میں خاتون سمیت ایک شخص ہلاک ہوگئے۔
ذرائع کے مطابق گزشتہ شب نامعلوم مسلح افراد نے پنجگور میں ایک گھر پر حملہ کرتے ہوئے فائرنگ کی، جس کے نتیجے میں شاکر ولد رشید نامی شخص موقع پر ہی ہلاک ہوگئے۔ مقتول کا تعلق پنجگور ہی سے بتایا جا رہا ہے۔
فائرنگ کی وجوہات تاحال سامنے نہیں آ سکیں جبکہ حملہ آور فرار ہونے میں کامیاب رہے۔
دوسری جانب بلوچستان کے ضلع ضلع جھل مگسی کے علاقے گوٹھ لنڈا میں اعجاز مگسی نامی شخص نے مبینہ طور پر فائرنگ کرکے اپنی بیوی ریحانہ مگسی کو قتل کر دیا اور واقعے کے بعد موقع سے فرار ہو گیا۔ پولیس نے خاتون کی لاش تحویل میں لے کر اسپتال منتقل کر دی ہے اور ملزم کی تلاش جاری ہے۔
بلوچستان میں غیرت کے نام پر قتل کے واقعات میں مسلسل اضافہ دیکھا جا رہا ہے، تاہم قانون نافذ کرنے والے اداروں کی جانب سے اس حوالے سے کوئی مؤثر اقدامات سامنے نہیں آئے۔
عورت فاؤنڈیشن کی ایک رپورٹ کے مطابق 2019 سے 2024 کے دوران بلوچستان میں غیرت کے نام پر قتل کے 212 واقعات رپورٹ ہوئے۔
