بلوچستان کے ضلع کیچ کے مرکزی شہر تربت سے چار سال قبل پاکستانی فورسز کے ہاتھوں جبری گمشدگی کے شکار ہونے والے نوجوان فتح ولد معیار بازیاب ہوکر اپنے گھر پہنچ گئے ہیں۔
واضح رہے کہ فتح کے والد معیار نے بیٹے کی بازیابی کے لیے مسلسل احتجاج جاری رکھا تھا اور اسلام آباد میں بھی لاپتہ افراد کے لواحقین کے ساتھ دھرنے میں شریک رہے تھے۔ آج ان کی مسلسل جدوجہد کے بعد فتح بازیاب ہوکر گھر پہنچ گئے۔
دوسری جانب بلوچ اسٹوڈنٹس فرنٹ (بی ایس ایف) کے مرکزی چیئرمین جاوید بلوچ بھی چار ماہ سے زائد عرصے بعد بازیاب ہوگئے ہیں۔ انہیں 23 اپریل 2025 کی رات کراچی کے علاقے گلستانِ جوہر میں واقع رہائش گاہ سے پاکستانی فورسز نے مبینہ طور پر حراست میں لے کر لاپتہ کردیا تھا۔ ان کی جبری گمشدگی کو چار ماہ اور 27 دن مکمل ہوچکے تھے۔
جاوید بلوچ 18 ستمبر 2025 کی شب تقریباً رات 10 بجے کراچی سے بحفاظت بازیاب ہوئے۔ ان کی بازیابی کی تصدیق بلوچ اسٹوڈنٹس فرنٹ اور وائس فار بلوچ مسنگ پرسنز نے بھی کردی ہے۔
