بلوچستان کے ضلع ڈیرہ بگٹی کی تحصیل سوئی کے علاقے سغاری میں دو الگ الگ بم دھماکوں کے نتیجے میں خاتون اور بچے سمیت تین افراد جاں بحق جبکہ چھ افراد زخمی ہو گئے۔
ابتدائی اطلاعات کے مطابق پہلے دھماکے میں بارودی سرنگ پھٹنے سے عثمان بگٹی کی اہلیہ اور بچہ موقع پر جاں بحق ہو گئے۔ اسی دوران علاقے میں ایک اور دھماکے کے نتیجے میں مقامی کسان علی کے لگ زندگی کی بازی ہار گئے۔
مقامی ذرائع کا کہنا ہے کہ گزشتہ ایک ماہ سے سوئی کے علاقے لنجو اور سغاری میں مبینہ طور پر صوبائی وزیر اعلیٰ سرفراز بگٹی کے ڈیتھ اسکواڈ کی جانب سے کسانوں کی زمینوں پر قبضے کے لیے بارودی سرنگیں بچھائی جا رہی ہیں۔ ان دھماکوں میں نہ صرف انسانی جانیں ضائع ہو رہی ہیں بلکہ کئی مویشی بھی ہلاک ہو چکے ہیں۔
رہائشیوں کے مطابق علاقے میں آئے روز گھروں پر فائرنگ کے واقعات بھی رونما ہو رہے ہیں، جس سے مقامی آبادی شدید خوف و ہراس کا شکار ہے۔
ذرائع نے دعویٰ کیا ہے کہ گزشتہ روز سرفراز بگٹی اور ایف سی کی جانب سے مذکورہ ڈیتھ اسکواڈ کو بڑی تعداد میں اسلحہ اور کیمپوں کے لیے راشن فراہم کیا گیا تھا، جس کے بعد آج بم دھماکوں کے واقعات میں مزید شدت آئی ہے۔
