بلوچستان کے ضلع کیچ کے علاقے مند میں نامعلوم مسلح افراد کی فائرنگ کے نتیجے میں فرنٹیئر کور (ایف سی) کے دو اہلکار موقع پر ہلاک ہوگئے۔
سرکاری ذرائع کے مطابق واقعہ جمعے کی صبح مند کے نواحی علاقے کوہ پشت گیاب میں پیش آیا، جہاں ایف سی کے اہلکار معمول کی گشت پر تھے۔ مسلح افراد نے اچانک ان پر فائرنگ کر دی جس کے نتیجے میں سپاہی جمیل احمد اور عزیز اللہ موقع پر ہی دم توڑ گئے۔
ذرائع کا کہنا ہے کہ دونوں اہلکار موٹرسائیکل پر سوار تھے جب انہیں نشانہ بنایا گیا۔ حملہ آور فائرنگ کے بعد اہلکاروں کا اسلحہ بھی ساتھ لے گئے اور فرار ہونے میں کامیاب ہوگئے۔
واقعے کی اطلاع ملتے ہی پولیس اور سکیورٹی فورسز جائے وقوعہ پر پہنچ گئیں اور لاشوں کو تحویل میں لے کر ہسپتال منتقل کر دیا گیا۔
تاہم، تاحال کسی تنظیم نے حملے کی ذمہ داری قبول نہیں کی ہے۔
