بلوچستان کے ضلع آواران کے علاقے مشکے اوگار میں گزشتہ روز مسلح افراد نے ایک فوجی چوکی کو نشانہ بنایا۔ ذرائع کے مطابق حملہ آوروں نے بعد ازاں چوکی سے نکلنے والی فوجی گاڑی پر گھات لگا کر شدید فائرنگ کی، جس کے نتیجے میں گاڑی مکمل طور پر تباہ ہوگئی اور اس میں سوار تمام اہلکار ہلاک ہوگئے۔ بعد ازاں لاشوں کو منتقل کرنے کے لیے ہیلی کاپٹر جائے وقوعہ پر پہنچا۔
دوسری جانب کھوسٹ کے علاقے شاہرگ میں نامعلوم افراد نے گیس پلانٹ کے ٹینکرز پر دھماکہ خیز مواد نصب کر کے انہیں تباہ کردیا۔
اسی طرح ضلع کیچ کے علاقے گورکوپ میں نامعلوم مسلح افراد نے پاکستانی فورسز کو بم دھماکے میں نشانہ بنایا۔ علاقائی ذرائع کا کہنا ہے کہ ہژدہ ءِ موڑ کے مقام پر فورسز کے راستے میں بارودی سرنگ نصب کی گئی تھی، جس کی زد میں فورسز کا بم ڈسپوزل اسکواڈ آیا اور جانی نقصان کی اطلاعات موصول ہوئیں ہے۔
ادھر زامران کے علاقے ارچنان میں فورسز کے پوسٹ کے قریب واٹر سپلائی پوائنٹ پر بھی بارودی سرنگ بچھائی گئی، جو فورسز کے اہلکاروں کے پہنچنے پر زور دار دھماکے سے پھٹ گئی۔
ان تمام حملوں کی ذمہ داری تاحال کسی تنظیم نے قبول نہیں کی ہے۔ تاہم، حالیہ دنوں میں بلوچستان بھر میں بلوچ مسلح تنظیموں کی کارروائیوں میں اضافہ دیکھا جا رہا ہے۔
