مکران کوسٹل ہائی وے پر مسافر بس اور پروبکس گاڑی کے درمیان تصادم کے نتیجے میں خضدار کا رہائشی زاکر ولد غلام رسول موقع پر ہلاک ہوگیا، جبکہ عبدالغنی ولد عبدالمجید زخمی ہوا۔ حادثہ دارو ڈگار کے مقام پر پیش آیا۔
عینی شاہدین کے مطابق حادثے کی وجہ تیز رفتاری تھی۔ مقامی ذرائع کا کہنا ہے کہ مکران کوسٹل ہائی وے پر مسافر بسوں کے سفر کے لیے مقررہ اوقات نافذ ہونے کے بعد ڈرائیور وقت پر پہنچنے کی کوشش میں تیز رفتاری اختیار کرنے پر مجبور ہیں، جس کے باعث حادثات میں اضافے کا خدشہ بڑھ گیا ہے۔
دوسری جانب گزشتہ روز تمپ میں زبیدہ جلال روڈ پر اسکول وین سے گرنے کے باعث 10 سالہ عزیز ولد نصرت جان کی بازی ہار گیا۔ بتایا جاتا ہے کہ لٹل گرامر اسکول کا طالبعلم عزیز وین کی چھت پر بیٹھا تھا کہ اچانک سڑک ٹوٹنے سے وین کو جھٹکا لگا اور بچہ نیچے گر کر موقع پر ہی ہلاک ہوگیا۔
مقامی آبادی نے انتظامیہ سے مطالبہ کیا ہے کہ مکران کوسٹل ہائی وے اور اندرون علاقوں کی خستہ حال سڑکوں کی مرمت کی جائے اور ٹریفک قوانین پر سختی سے عمل درآمد کرایا جائے تاکہ قیمتی جانوں کا ضیاع روکا جا سکے۔
