نوشکی ( مانیٹرنگ ڈیسک )بلوچستان نوشکی میں استاد فرید احمد بادینی کی بازیابی کے لئے بلوچ یکجہتی کمیٹی بی وائے سی اور انکے لواحقین کی جانب سے میر گل خان نصیر لائبریری سے احتجاجی ریلی نکالی گئی ،ریلی نواب اکبر بگٹی روڑ سے ہوتے ہوئے پریس کلب نوشکی پہنچی ۔
مظاہرین نے استاد فرید احمد بادینی اور دیگر لاپتہ افراد کے بازیابی کے لئے نعرے بازی کی۔ ریلی میں خواتین ،بچے بچیوں سمیت نوجوانوں اور سیاسی جماعتوں کے کارکنوں نے شرکت کی ۔
احتجاجی ریلی سے استاد فرید احمد کی صاحبزادی لبانہ بادینی، بیبرگ بلوچ، ماہین بلوچ، کامریڈ امین بلوچ، نیشنل پارٹی کے فاروق بلوچ، بلوچستان نیشنل پارٹی بی این پی کے میر خورشید جمالدینی، مولانا زکریا عادل، جمعیت علمائے اسلام جی ٹی اے کے ظاہر بلوچ، مشتاق بلوچ ،ماہ پارہ بلوچ و دیگر نے خطاب کیا ۔
مقررین نے جبری گمشدگیوں میں اضافے پر تشویش کا اظہار کرکے استاد فرید احمد کی فوری بازیابی کا مطالبہ کرتے ہوئے کہاکہ معاشرے کے معمار بھی اب بلوچستان میں محفوظ نہیں، استاد فرید امراض قلب اور بلڈ پریشر کے مریض ہیں ان کی ایک مہینہ سے جبری گمشدگی سے خاندان میں انکی زندگی کے حوالے سے شدید تشویش پائی جاتی ہے۔
انہوں نے خبردار کیا کہ اگر ایک ہفتے کے اندر استاد فرید احمد بازیاب نہ کیا تو قومی شاہراہ پر غیر معینہ مدت کے لئے دھرنا دیا جائے گا ۔
