نوشکی میں سات گھر نذرِ آتش، سات مکانات پر مارٹر گولوں سے حملے، پانچ بچے زخمی۔ بلوچ یکجہتی کمیٹی

بلوچ یکجہتی کمیٹی نے پاکستانی فورسز پر گھروں کو جلانے، رہائشی آبادیوں پر مارٹر گولے فائر کرنے، خواتین اور بچوں کو دھمکانے اور شہریوں کو جبری طور پر لاپتہ کرنے کا الزام عائد کرتے ہوئے کہا ہے کہ اجتماعی سزا کو سکیورٹی کے نام پر کسی صورت جائز قرار نہیں دیا جا سکتا۔

بلوچ یکجہتی کمیٹی کے مطابق 11 سے 17 نومبر 2026 کے دوران نوشکی کے مختلف علاقوں میں فورسز کی کارروائیوں کے دوران کم از کم سات خاندانوں کے گھروں کو نذرِ آتش کیا گیا، جبکہ سات رہائشی مکانات پر مارٹر گولے گرنے سے کم از کم پانچ بچے زخمی ہوئے۔ کمیٹی نے الزام عائد کیا کہ کارروائیوں کے دوران خواتین اور بچوں کو اپنے ہی گھروں میں تشدد، ہراسانی اور جبری گمشدگی کی دھمکیاں دی گئیں، جبکہ ایک والد اور اس کے تین بیٹوں سمیت متعدد افراد کو حراست میں لے کر نامعلوم مقامات پر منتقل کیا گیا۔

کمیٹی کا کہنا ہے کہ متاثرہ خاندانوں کے گھر، خوراک کے ذخائر، بچوں کی درسی کتابیں، اسکول یونیفارم، تعلیمی دستاویزات اور روزگار کے ذرائع تباہ کر دیے گئے۔ ان کارروائیوں سے خواتین، بچوں اور عام شہریوں کی زندگی شدید متاثر ہوئی ہے۔

کمیٹی کے بیان کے مطابق 11 نومبر کی صبح تقریباً چھ بجے فرنٹیئر کور کے اہلکاروں نے سادہ لباس میں ملبوس افراد، جنہیں مقامی طور پر ڈیتھ اسکواڈ کہا جاتا ہے، کے ہمراہ کلی جمالدینی میں محمد عظیم کے گھر پر چھاپہ مار کر اسے آگ لگا دی۔ آگ سے گھر کا کچن، ڈرائنگ روم، فرنیچر، فریج، ٹیلی ویژن، صوفے، 40 سے زائد بلوچی ملبوسات اور دیگر گھریلو سامان جل کر خاکستر ہو گیا۔ خاندان کے زرعی گودام میں موجود گندم کی 50 سے زائد بوریاں اور تقریباً 70 من کپاس بھی جل گئی، جبکہ خاندان کا ایک پالتو کتا شدید جھلس گیا۔ بچوں کے اسکول بیگ، کتابیں، یونیفارم اور تعلیمی دستاویزات بھی تباہ ہو گئیں۔

بیان میں کہا گیا ہے کہ گھر میں موجود خواتین اور بچوں کو آگ بجھانے کی کوشش پر جبری گمشدگی کی دھمکیاں دی گئیں اور انہیں نامعلوم مقام پر منتقل کرنے کی دھمکی دی گئی۔

کمیٹی کے مطابق 13 نومبر کی صبح اسی علاقے میں عبدالصمد کے بیٹے محمد امین کے چار کمروں پر مشتمل گھر کو بھی آگ لگا دی گئی۔ گھر میں موجود تمام فرنیچر، کپڑے، الیکٹرانک سامان، موٹر سائیکل اور بچوں کا تعلیمی سامان جل گیا، جبکہ 38 سولر پینل توڑ دیے گئے اور دیگر گھریلو اشیا بھی لے جائی گئیں۔ اسی روز عبدالصمد کے ایک اور بیٹے حمیداللہ کے گھر کے دو کمرے اور کچن بھی نذرِ آتش کر دیے گئے، جبکہ دو سی ڈی 70 موٹر سائیکلیں اہلکار اپنے ساتھ لے گئے۔ کمیٹی کے مطابق یہ تینوں گھر ایک ہی خاندان کے افراد کے تھے۔

بلوچ یکجہتی کمیٹی نے مزید بتایا کہ 12 نومبر کو غریب آباد، نوشکی میں عابد مینگل کے گھر کو بھی اہلکاروں نے سامان سمیت آگ لگا دی۔ اس دوران خواتین اور بچوں کو دھمکایا گیا، جبکہ عابد مینگل اور ان کے تین بیٹوں، جن میں ولید اور امتیاز بھی شامل ہیں، کو حراست میں لے کر نامعلوم مقام پر منتقل کر دیا گیا۔

بیان کے مطابق 13 نومبر کو قاضی آباد میں محمد اسماعیل کے گھر پر چھاپے کے دوران اہلکاروں نے خاندان کے افراد کو دھمکانے کے بعد کچن میں بند کر دیا اور چار کمروں پر مشتمل پورے گھر کو آگ لگا دی، جس سے گھر کا تمام سامان اور ضروری اشیا تباہ ہو گئیں۔

بلوچ یکجہتی کمیٹی کے مطابق 17 نومبر کی سہ پہر تقریباً تین بجے کلی فقیران میں فورسز نے عبدالستار اور خان رزاق کے گھروں کو آگ لگا دی۔ گھروں میں موجود فریج، قالین، برتن اور دیگر سامان تباہ کر دیا گیا، جبکہ ایک موٹر سائیکل اور روزگار کے لیے استعمال ہونے والی دیگر اشیا بھی لے جائی گئیں۔

کمیٹی کے بیان میں کہا گیا ہے کہ اسی کارروائی کے دوران خان رزاق کے بیٹے جمیل احمد اور ان کے ماموں کو تشدد کا نشانہ بنانے کے بعد نامعلوم مقام پر منتقل کیا گیا۔ دونوں افراد پر شدید جسمانی تشدد کیا گیا، تاہم بعد ازاں انہیں اسی رات رہا کر دیا گیا۔

بیان کے مطابق اسی دوران رہائشی آبادی پر سات مارٹر گولے فائر کیے گئے، جن میں سے چھ محمد طیب ولد عبدالوهاب، عبدالرشید ولد عبدالصبور، عزیزاللہ، نجیب اللہ ولد ہاشم، کونسلر جانان اور سلیم احمد ولد محمد عمر کے گھروں پر گرے، جبکہ ساتواں گولہ گاؤں کے شمالی حصے میں جمعہ خان کے گھر پر گرا۔

بلوچ یکجہتی کمیٹی کا کہنا ہے کہ مارٹر حملوں کے نتیجے میں کم از کم پانچ بچے زخمی ہوئے، جن میں جمعہ خان کا 14 سالہ بیٹا جواد احمد بھی شامل ہے، جو ساتویں جماعت کا طالب علم ہے۔ اس کے علاوہ عبدالرشید کی ایک بیٹی اور تین دیگر بچے بھی زخمی ہوئے۔

کمیٹی نے کہا ہے کہ کلی فقیران میں یہ کارروائیاں اجتماعی ہراسانی اور سزا کے ایک مسلسل سلسلے کا حصہ ہیں۔ اس سے قبل بھی دو مرتبہ سینکڑوں مقامی رہائشیوں کو زبردستی حراست میں لے کر فوجی کیمپ منتقل کیا گیا، جہاں انہیں تذلیل کا نشانہ بنایا گیا اور ان کے موبائل فون اور نقد رقم چھین لی گئی۔ ان واقعات پر عوامی سطح پر شدید ردعمل سامنے آیا تھا۔

بلوچ یکجہتی کمیٹی نے اپنے بیان میں کہا کہ گھروں کو جلانا، خوراک کے ذخائر تباہ کرنا، والد اور بیٹوں کو اٹھانا اور رہائشی علاقوں پر مارٹر گولے فائر کرنا سکیورٹی اقدامات نہیں بلکہ پوری آبادی کو خوف و ہراس میں مبتلا کرنے کے مترادف ہے۔ کمیٹی کے مطابق اجتماعی سزا بین الاقوامی قوانین کے تحت ممنوع ہے اور آئینِ پاکستان بھی شہریوں کی عزت، جان و مال اور گھر کی حرمت کے تحفظ کی ضمانت دیتا ہے۔

بلوچ یکجہتی کمیٹی نے مطالبہ کیا ہے کہ نوشکی میں چھاپوں اور گھروں کو نذرِ آتش کرنے کا سلسلہ فوری بند کیا جائے، عابد مینگل اور ان کے تینوں بیٹوں کو بحفاظت بازیاب کرایا جائے، گھروں کو جلانے اور مارٹر حملوں کے واقعات کی آزادانہ اور شفاف تحقیقات کی جائیں، ذمہ داروں کا تعین کر کے انہیں قانون کے کٹہرے میں لایا جائے، تمام متاثرہ خاندانوں کو مکمل معاوضہ دیا جائے اور زخمی بچوں کو فوری طبی سہولیات فراہم کی جائیں۔

کمیٹی نے واضح کیا ہے کہ اجتماعی سزا، شہریوں کے گھروں کو جلانا، جبری گمشدگیاں اور معصوم بچوں کی زندگیوں کو خطرے میں ڈالنا کسی بھی صورت قابلِ قبول نہیں اور سکیورٹی کے نام پر پوری آبادی کو سزا دینا بنیادی انسانی حقوق اور انسانی وقار کی خلاف ورزی ہے۔

مدیر

نیوز ایڈیٹر زرمبش اردو

مدیر

نیوز ایڈیٹر زرمبش اردو

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Next Post

بلوچستان کی شاہراہوں پر ایک روز میں ٹریفک کے 48 واقعات، 56 افراد زخمی

پیر نومبر 23 , 2026
بلوچستان کی مختلف مرکزی شاہراہوں پر 21 نومبر کو ٹریفک حادثات کے 48 واقعات پیش آئے جن میں 56 افراد زخمی ہوگئے، تاہم کسی حادثے میں کوئی جانی نقصان رپورٹ نہیں ہوا۔ میڈیکل ایمرجنسی رسپانس سینٹرز (ایم ای آر سی)1122بلوچستان کی جانب سے جاری کردہ یومیہ رپورٹ کے مطابق سب […]

توجہ فرمائیں

زرمبش اردو

زرمبش آزادی کا راستہ

زرمبش اردو ، زرمبش براڈ کاسٹنگ کی طرف سے اردو زبان میں رپورٹس اور خبری شائع کرتا ہے۔ یہ خبریں تحریر، آڈیوز اور ویڈیوز کی شکل میں شائع کی جاتی ہیں۔

آسان مشاہدہ