ایرانی پاسداران انقلاب نے اپنے بحریہ کے کمانڈر علی رضا تنگسیری کی ہلاکت کی باضابطہ تصدیق کر دی ہے۔
ایرانی خبر رساں ادارے تسنیم کے مطابق پاسداران انقلاب کی جانب سے جاری بیان میں کہا گیا ہے کہ علی رضا تنگسیری حالیہ دنوں میں زخمی ہوئے تھے اور زخموں کی تاب نہ لاتے ہوئے ہلاک ہو گئے۔ بیان کے مطابق وہ فوج کی تنظیمِ نو اور جزائر و ساحلی علاقوں کے دفاعی نظام کو مضبوط بنانے میں مصروف تھے۔
واضح رہے کہ چار روز قبل اسرائیل کی جانب سے دعویٰ کیا گیا تھا کہ اس نے ایک کارروائی میں ایرانی بحری کمانڈر کو نشانہ بنایا ہے، تاہم اس وقت ایران کی جانب سے اس کی تصدیق نہیں کی گئی تھی۔
بیان میں مزید کہا گیا کہ کمانڈر کی عدم موجودگی کے باوجود پاسداران انقلاب نے اپنی کارروائیاں جاری رکھیں اور آبنائے ہرمز پر کنٹرول برقرار رکھا۔
ایرانی حکام کی جانب سے اس واقعے کو اہم قرار دیا جا رہا ہے، جبکہ خطے میں جاری کشیدگی کے تناظر میں اس پیش رفت کو غیر معمولی اہمیت دی جا رہی ہے۔
