بلوچ اسٹوڈنٹس آرگنائزیشن آزاد (BSO Azad) کے ترجمان شولان بلوچ نے کہا ہے کہ ہمارے شہداء قومی جدوجہد کا حقیقی سرمایہ ہیں، جن کی تحریک میں وابستگی اور قربانیاں وہ لٹریچر ہیں جو نہ صرف ہمیں حوصلہ دیتے ہیں بلکہ قابض طاقت کے خلاف جدوجہد میں ہماری رہنمائی کرتے ہیں۔ قربانی کے مقدس فلسفے کے تحت شہداء نے بلوچستان کی آزادی کے لیے اپنی ہر ذاتی خواہش، آزادی، آسائشیں اور قیمتی زندگیاں قربان کر دیں اور بلوچ قوم کی تاریخ میں ہمیشہ کے لیے امر ہو گئے۔
ترجمان کی جانب سے جاری کردہ بیان کے مطابق، قربان ہونے والے سرمچاروں، سیاسی کارکنوں اور عام شہریوں کو خراجِ تحسین پیش کرنے اور ان کی خدمات کو یاد رکھنے کے لیے تنظیم نے 13 نومبر کو ‘یومِ شہداءِ بلوچستان’ کے طور پر نامزد کیا ہے۔ اس مناسبت سے بی ایس او آزاد کا میڈیا ڈرپارٹمنٹ دو ہفتے کی ایک طویل ملک گیر سوشل میڈیا مہم کا آغاز کر رہا ہے، جس کا مقصد بلوچ قومی آزادی کی تحریک کے شہداء اور گرے ہوئے ساتھیوں کو خراجِ عقیدت پیش کرنا ہے۔
بیان کے مطابق مہم کے دوران میڈیا ڈپارٹمنٹ کی طرف سے بلوچ شہداء کی تفصیلات، سوانح حیات، مضامین، کہانیاں، بصری مواد (ویژولز)، دستاویزی رپورٹس اور دیگر متعلقہ مواد شیئر کیا جائے گا۔ اس دو ہفتے کی ملک گیر مہم کے سلسلے میں بلوچستان بھر اور دنیا بھر میں قومی یادگاری ریفرنس تقریبات کا انعقاد بھی کیا جائے گا۔
بی ایس او آزاد نے تمام بلوچ تنظیموں، سوشل میڈیا کے فعال کارکنوں، صحافیوں، سیاسی ورکرز اور بالخصوص پوری بلوچ قوم سے پرزور اپیل کی ہے کہ وہ اس مہم میں بھرپور شرکت کریں اور قومی شہداء کو خراجِ تحسین پیش کرنے کے لیے یادگاری سرگرمیوں کا اہتمام کریں۔
