بلوچ لبریشن آرمی کے ترجمان جیئند بلوچ نے جاری کردہ بیان میں کہا ہے کہ سرمچاروں نے تربت، کوئٹہ اور خاران میں چار مختلف کارروائیاں سرانجام دیں جن میں قابض پاکستانی فوج کو نشانہ بنایا گیا، پولیس اہلکاروں کا اسلحہ ضبط کیا گیا جبکہ مرکزی شاہراہوں پر ناکہ بندی کرکے دو افراد کو حراست میں لیا گیا۔
ترجمان نے کہا کہ بلوچ لبریشن آرمی کے سرمچاروں نے آج تربت کے مضافاتی علاقے میں مرکزی شاہراہ پر قائم قابض پاکستانی فوج کی چوکی پر حملہ کیا۔ سرمچاروں نے قابض فوج پر راکٹ لانچر سے متعدد گولے داغے، جس کے نتیجے میں انہیں جانی و مالی نقصان پہنچا۔
انہوں نے کہا کہ دریں اثنا بلوچ لبریشن آرمی کے سرمچاروں نے کوئٹہ میں میاں غنڈی کے مقام پر پولیس اہلکاروں کا اسلحہ اور دیگر سامان اس وقت ضبط کیا جب وہ موٹر سائیکل پر گشت کر رہے تھے۔ اہلکاروں کو تنبیہ کے بعد رہا کر دیا گیا۔
ترجمان نے مزید کہا کہ گزشتہ روز بلوچ لبریشن آرمی کے سرمچاروں نے خاران تا نوشکی اور خاران تا بسیمہ مرکزی سڑکوں پر ناکہ بندیاں قائم کیں۔ سرمچاروں نے اسنیپ چیکنگ دو گھنٹے سے زائد جاری رکھی، اس دوران دو مشکوک افراد کو حراست میں لیا گیا جن سے تفتیش جاری ہے۔
بیان میں کہا گیا کہ مزید برآں سرمچاروں نے پولیس اہلکاروں کی ایک گاڑی بھی اپنی تحویل میں لے لی۔
