بلوچستان کے ضلع ڈیرہ بگٹی کے علاقہ سوئی شاہ زین پمپ کے مقام پر دن دھاڑے پاکستانی فوج نے خیر اللہ ولد مراد بگٹی کو تشدد کا نشانہ بنانے کے بعد جبری طور پر لاپتہ کردیا۔
آپ کو علم ہے سوئی میں گزشتہ ایک مہینے کے دوران پچاس کے قریب لوگوں کو جبری طور پر لاپتہ کردیا گیا ہے۔
علاقائی ذرائع کا کہنا ہے کہ پاکستانی فوج اور سی ٹی ڈی کی جانب سے یہ کاروئیاں کی جارہی ہیں جبکہ ان کو سرفراز بگٹی کے ڈیتھ سکواڈ کی بھی بھرپور مدد حاصل ہے۔
سوئی میں چھاپوں کے دوران گھروں میں لوٹ مار اور خواتین و بچوں کو تشدد کا نشانہ بنانا بھی جاری ہے۔
علاوہ ازیں تربت میں بیس دن قبل پاکستانی فورسز کے ہاتھوں لاپتہ ہونے والے شخص بازیاب ہوگیا ہے۔
تفصیلات کے مطابق بازیاب ہونے والے شخص کی سناخت حیات ولد جمعہ سکنہ تربت آپسر کے نام سے ہواہے، حیات کو پاکستانی خفیہ اداروں کے اہلکاروں نے 11 مئی کو لاپتہ کرکے نامعلوم مقام پر منتقل کیا تھا جو آج بازیاب ہوا ہے۔
