بلوچستان کے ضلع کیچ کے مرکزی شہر تربت میں کیچ کور ندی کے حفاظتی بند کے قریب دو افراد کی لاشیں برآمد ہوئی ہیں۔
اطلاع ملنے پر پولیس نے دونوں لاشوں کو تحویل میں لے کر ٹیچنگ ہسپتال تربت منتقل کر دیا۔
ذرائع کے مطابق لاشوں کے قریب ملنے والی شناختی دستاویزات کی بنیاد پر ان کی شناخت محمد صادق ولد نور اللہ، ساکن ناگ زامران اور مسلم علی ولد سخی داد، ساکن بٹ تحصیل بلیدہ کے ناموں سے ہوئی ہے۔
ہسپتال ذرائع کا کہنا ہے کہ دونوں افراد کو گولیاں مار کر قتل کیا گیا ہے۔
اطلاعات کے مطابق تربت میں گزشتہ دو ہفتوں کے دوران اس نوعیت کے واقعات میں اضافہ دیکھنے میں آیا ہے اور اب تک مختلف مقامات سے چھ افراد کی لاشیں برآمد ہو چکی ہیں، جس پر شہری حلقوں میں تشویش پائی جا رہی ہے۔
ذرائع کے مطابق لاشوں کی حالت سے یہ تاثر لیا جا رہا ہے کہ ممکنہ طور پر وہ جبری لاپتہ افراد ہو سکتے ہیں۔
پولیس کے مطابق واقعے کی تحقیقات شروع کر دی گئی ہیں۔
