بلوچستان کے ضلع خاران کے علاقے المرگ کے قریب سے دو افراد کی لاشیں برآمد ہوئی ہیں، جنہیں نامعلوم افراد نے گولی مار کر قتل کر دیا۔
مقامی ذرائع کے مطابق ہلاک افراد کی شناخت سعد ساسولی اور احمد محمد حسنی کے ناموں سے ہوئی ہے۔ ذرائع کا کہنا ہے کہ دونوں افراد کو چند روز قبل برشونکی کے علاقے میں پیش آنے والی ایک جھڑپ کے دوران مسلح افراد نے اغواء کر لیا تھا۔
اطلاعات کے مطابق لاشوں پر گولیوں کے نشانات پائے گئے ہیں، جس سے ظاہر ہوتا ہے کہ انہیں فائرنگ کر کے قتل کیا گیا۔ لاشوں کو ضروری کارروائی کے لیے قریبی اسپتال منتقل کر دیا گیا ہے۔
تاحال واقعے کے محرکات سامنے نہیں آ سکے ہیں، جبکہ کسی بھی تنظیم کی جانب سے حملے کی ذمہ داری بھی قبول نہیں کی گئی۔ حکام کی جانب سے واقعے کی تحقیقات شروع کر دی گئی ہیں تاکہ قتل کے اسباب اور ذمہ داران کا تعین کیا جا سکے۔
