تربت: ایم ایٹ شاہراہ پر ہیرونک کے مقام پر ایک تیز رفتار کار حادثے کا شکار ہوگئی، جس کے نتیجے میں دو خواتین جاں بحق جبکہ تین افراد زخمی ہوگئے۔
عینی شاہدین کے مطابق حادثہ تیز رفتاری کے باعث پیش آیا جب ایک کرولا گاڑی سڑک سے پھسل کر گہری کھائی میں جا گری۔ جاں بحق ہونے والی خواتین کی شناخت لائبہ دختر مراد حاصل اور رئسیانہ زوجہ مراد حاصل کے نام سے ہوئی ہے۔
زخمیوں میں خدا بخش ولد مراد حاصل، فیروزہ دختر مراد حاصل اور مراد حاصل ولد خدا بخش شامل ہیں۔ پولیس کے مطابق گاڑی کا ڈرائیور رفیق ولد دل مراد حادثے میں محفوظ رہا۔
واقعے کے بعد مقامی افراد اور ریسکیو ٹیموں نے موقع پر پہنچ کر زخمیوں کو قریبی اسپتال منتقل کیا۔
علاقہ مکینوں نے حکومت سے مطالبہ کیا ہے کہ ایم ایٹ شاہراہ اور بلوچستان کی دیگر سڑکوں کی خستہ حالی پر فوری توجہ دی جائے، کیونکہ سڑکوں کی خرابی اور حفاظتی انتظامات کے فقدان کے باعث آئے روز قیمتی جانیں ضائع ہو رہی ہیں۔
