مستونگ: ڈپٹی کمشنر مستونگ نے تحصیل کردگاپ میں لیویز اسٹیشن پر حملے کے بعد 18 لیویز اہلکاروں کو ملازمت سے برطرف کر دیا۔ یہ اقدام 21 جون کو ہونے والے حملے کے بعد کیا گیا، جس میں لیویز اسٹیشن، نادرا دفتر اور دیگر سرکاری املاک کو شدید نقصان پہنچایا گیا تھا۔
ذرائع کے مطابق، حملے کے دوران نہ صرف لیویز اسٹیشن کا ایک بڑا حصہ تباہ ہوا بلکہ سرکاری اسلحہ اور مواصلاتی آلات بھی حملہ آور ساتھ لے گئے۔
ڈپٹی کمشنر نے کارروائی کرتے ہوئے بلوچستان لیویز فورس ڈسپلنری رولز 2015 کے تحت مذکورہ اہلکاروں کو سروس سے فارغ کرنے کے احکامات جاری کیے۔
سرکاری اعلامیے میں کہا گیا ہے کہ یہ اہلکار حملے کے دوران اپنے فرائض کی انجام دہی میں مکمل طور پر ناکام رہے، جس کے باعث نہ صرف مالی نقصان ہوا بلکہ ریاستی رٹ کو بھی شدید دھچکہ پہنچا۔
