کیچ کے علاقہ میری بگ تربت سے رات گئے سرکاری مسلح جتھےکے کارندوں نے اقبال ولد اللہ داد نامی شخص کے گھر میں گھس کر اسلح کے زور پر انھیں اغوا کرلیا ۔
بتایا جارہاہے کہ گھر سے ایک موٹر سائیکل اور تین عدد موبائل فون بھی لے گئے ہیں۔
علاوہ ازیں کاہان مسلح افراد کے حملے میں ایک شخص ہلاک ،تفصیلات کےمطابق کاہان میں مسلح افراد نے فائرنگ کرکے مالو گنگرانی نامی شخص کو قتل کردیا ۔
ذرائع کا کہنا ہے کہ مذکورہ شخص کا تعلق حکومتی حمایت یافتہ مسلح جتھے یعنی ڈیتھ اسکواڈ سے تھا۔
دریں اثناء پاکستان کے زیر انتظام کشمیر سے تعلق رکھنے والے شاعر اور صحافی احمد فرہاد کو لاپتہ کردیا گیا ہے ۔
ان کی اہلیہ کا کہنا ہےکہ اغوا کار گھر میں گھس آئے اور سی سی ٹی وی کا رابطہ منقطع کر دیا اور احمد فرہاد کو زبردستی گھسیٹ کر گھر سے باہر لے گئے۔
ذرائع کے مطابق فرہاد کی گمشدگی پاکستان کے زیر انتظام کشمیر میں ہونے والے مظاہروں کے بارے میں ان کی حالیہ رپورٹنگ سے منسلک ہے۔
