وائس فار بلوچ مسنگ پرسنز (VBMP) کے مطابق تنظیم کو شکایت موصول ہوئی ہے کہ بلوچستان کے ضلع مستونگ میں مقامی صحافی نیاز بلوچ کو سکیورٹی فورسز نے ان کے گھر پر چھاپے کے دوران حراست میں لینے کے بعد نامعلوم مقام پر منتقل کر دیا ہے۔
اہلخانہ کے مطابق نہ تو نیاز بلوچ کی گرفتاری کی وجوہات بتائی جا رہی ہیں اور نہ ہی ان کے بارے میں کوئی معلومات فراہم کی جا رہی ہیں، جس کے باعث خاندان شدید ذہنی اذیت اور تشویش کا شکار ہے۔
وی بی ایم پی نے مقامی صحافی نیاز بلوچ کی مبینہ غیر قانونی حراست اور ان کے بارے میں معلومات فراہم نہ کرنے پر شدید تشویش کا اظہار کرتے ہوئے کہا کہ کسی بھی شہری کو ماورائے آئین و قانون حراست میں رکھنا بنیادی انسانی حقوق اور آئینی تقاضوں کے منافی ہے۔
وی بی ایم پی نے مطالبہ کیا ہے کہ نیاز بلوچ کو فوری طور پر بازیاب کرکے اہلخانہ کے حوالے کیا جائے۔ اگر ان پر کوئی الزام ہے تو انہیں منظرِ عام پر لا کر 24 گھنٹوں کے اندر متعلقہ عدالت میں پیش کیا جائے اور انہیں صفائی کا مکمل قانونی حق فراہم کیا جائے۔ مزید برآں، ان کی گرفتاری کی وجوہات اہلخانہ کو بتائی جائیں اور ان کے ساتھ قانون کے مطابق سلوک یقینی بنایا جائے۔
