کوئٹہ میں جبری گمشدگیوں کے خلاف وائس فار بلوچ مسنگ پرسنز (وی بی ایم پی) کے زیر اہتمام کوئٹہ پریس کلب کے سامنے قائم احتجاجی کیمپ 6144ویں روز بھی جاری رہا۔
کیمپ کی قیادت تنظیم کے چیئرمین نصراللہ بلوچ نے کی، جبکہ مختلف مکاتبِ فکر سے تعلق رکھنے والے افراد نے کیمپ کا دورہ کر کے لاپتہ افراد کے لواحقین سے اظہارِ یکجہتی کیا اور جبری گمشدگیوں کے خلاف احتجاج ریکارڈ کرایا۔
شرکاء نے لاپتہ افراد کی عدم بازیابی، ماورائے عدالت قتل اور جبری گمشدگیوں پر گہری تشویش کا اظہار کرتے ہوئے مطالبہ کیا کہ تمام لاپتہ افراد کو فوری طور پر بازیاب کیا جائے اور اس عمل کا مکمل خاتمہ یقینی بنایا جائے۔
اس موقع پر گفتگو کرتے ہوئے نصراللہ بلوچ نے کہا کہ جبری گمشدگیاں انسانیت کے خلاف سنگین جرم ہیں اور ایسے اقدامات کے خلاف ہر باشعور فرد کی ذمہ داری ہے کہ وہ آواز بلند کرے۔
انہوں نے سیاسی جماعتوں، طلبہ تنظیموں اور معاشرے کے دیگر طبقات سے اپیل کی کہ وہ جبری گمشدگیوں کے خلاف متحد ہو کر مؤثر آواز اٹھائیں تاکہ اس مسئلے کا حل نکالا جا سکے اور لاپتہ افراد کی بحفاظت بازیابی ممکن بنائی جا سکے۔
