بلوچستان کے علاقے نوکنڈی کے قریب ریکوڈک سائٹ روڈ پر تین گاڑیوں کے درمیان خوفناک تصادم کے نتیجے میں 3 افراد ہلاک جبکہ 18 افراد زخمی ہوگئے۔
تفصیلات کے مطابق یہ حادثہ گزشتہ شب پیش آیا، جب تین گاڑیاں آپس میں ٹکرا گئیں۔ تصادم اتنا شدید تھا کہ موقع پر ہی متعدد افراد زخمی ہوگئے جبکہ 3 افراد ہلاک ہوگئے۔
زخمیوں میں خواتین اور بچے بھی شامل ہیں، جن میں سے 5 افراد کی حالت تشویشناک بتائی جا رہی ہے۔
ابتدائی اطلاعات کے مطابق متاثرہ افراد میں زیادہ تر افغان باشندے شامل ہیں جو ایران جانے کے سفر پر تھے۔ ہلاک ہونے والوں میں ایک مقامی ڈرائیور جبکہ دو افغان شہری شامل ہیں۔
تمام زخمیوں کو فوری طور پر نوکنڈی سول ہسپتال منتقل کیا گیا جہاں انہیں ابتدائی طبی امداد دی گئی، جبکہ شدید زخمیوں میں سے 5 افراد کو مزید علاج کے لیے کوئٹہ ریفر کر دیا گیا ہے۔
واقعے کے بعد پولیس تھانہ نوکنڈی کے ایس ایچ او غلام دستگیر بڑیچ اپنی ٹیم کے ہمراہ جائے وقوعہ اور ہسپتال پہنچ گئے اور امدادی کارروائیوں کی نگرانی کی۔
