بلوچستان کے ضلع کیچ کی تحصیل تربت سے موصولہ اطلاعات کے مطابق پیر کے روز کمشنر روڈ پر پاکستانی فورسز کی تیز رفتار گاڑی کی ٹکر سے ایک خاتون ہلاک ہوگئی۔
ذرائع کے مطابق خاتون، جن کی شناخت حمیدہ کے نام سے ہوئی ہے، سڑک عبور کر رہی تھیں کہ اسی دوران ایک تیز رفتار گاڑی نے انہیں ٹکر مار دی، جس کے نتیجے میں وہ شدید زخمی ہو گئیں۔ ریسکیو ٹیموں نے زخمی خاتون کو فوری طور پر اسپتال منتقل کیا، تاہم وہ زخموں کی تاب نہ لاتے ہوئے ہلاک ہوگئیں۔
دوسری جانب پاکستانی فورسز کا مؤقف ہے کہ خاتون نے سڑک عبور کرتے وقت احتیاط نہیں برتی، جس کے باعث حادثہ پیش آیا۔
واقعے کے بعد لواحقین نے شفاف تحقیقات کا مطالبہ کیا ہے، جبکہ مقامی سطح پر فورسز کی گاڑیوں کی تیز رفتاری پر بھی سوالات اٹھائے جا رہے ہیں۔
